आन्तरिक स्रोतको दिगो परिचालन मार्फत् राष्ट्रिय स्रोत सुनिश्चितता गरी दिगो विकासको लक्ष्य हासिल गर्नमा आन्तरिक राजस्व विभागले महत्वपूर्ण भूमिका निर्वाह गर्दै आएको छ। सार्वजनिक खर्चमा भएको बढोत्तरी अनुरुप राजस्व परिचालन गरी स्रोतको व्यवस्थापनमा तालमेल मिलाउनु चुनौतीपूर्ण रहेको छ। यसका लागि करको दायरा विस्तार, डिजिटल कारोबारको माध्यमबाट कराधारको संरक्षण तथा नियमन, लगानीमैत्री कर कानूनको तर्जुमा, पारदर्शी व्यवहार र स्वयंकर प्रणालीमा आधारित प्रविधि एवं करदातामैत्री प्रशासनलाई सुदृढ गर्दै विभागले आफ्नो दैनिक काम कारबाही संचालन गर्दै आएको छ।
कर प्रणालीमा समयानुकूल सुधार ल्याई आन्तरिक स्रोतको परिचालनमा बढावा ल्याउने कार्यलाई मूर्तरुप दिन विभाग प्रयासरत छ। कर सहभागिता स्तरमा वृद्धिका लागि नीतिगत एवं कानूनी सहजता ल्याई सम्पूर्ण आर्थिक कारोबारलाई करको दायरामा ल्याउने, कर संकलन लागत र करदाताको कर परिपालन लागत घटाउने साथै कर प्रशासनलाई स्वच्छ, व्यवसायिक, प्रतिस्पर्धी, सदाचारमूलक बनाउने दिशातर्फ विभागले गरेको प्रयासका गतिलाई थप चलायमान बनाउनुपर्ने अवस्था छ।
आर्थिक क्षेत्रमा देखिएका विविध चुनौतीहरूका बाबजुद आन्तरिक राजस्व विभागले लिएका नीतिगत, व्यवस्थापकीय, कार्यविधिगत र प्रणालीगत सुधारका कारण आन्तरिक राजस्वको आधार विस्तार र दिगो हुँदै गएको छ। जसका कारण भविष्यमा सार्वजनिक वित्त व्यवस्थापन थप सुदृढ हुने आशा गर्न सकिन्छ। हाल ठूला करदाता कार्यालय 1, मध्यमस्तरीय करदाता कार्यालय 1,आन्तरिक राजस्व कार्यालय 43 र करदाता सेवा कार्यालय 39 गरी जम्मा 84 वटा कार्यालयहरूबाट उपरोक्त उद्देश्यबाट निर्देशित भई विभागले आवश्यक कार्य सम्पादन गर्दै आएको छ।
आर्थिक विस्तारलाई सहयोग पुग्ने गरी लगानीमैत्री कर प्रणाली अवलम्बन गर्न “कर प्रणालीको सार, लगानीको आधार” नारा सहित विभाग प्रतिबद्ध छ । कर प्रशासनलाई सूचना प्रविधिमा आधारित स्वच्छ र पारदर्शी बनाउँदै लक्षित उद्देश्य हासिल गर्न समग्र कर्मचारी वर्ग, करदाता तथा सरोकारवाला सबैमा हार्दिक अनुरोध गर्दछु ।
धन्यवाद ।
